کراچی میں درخشاں پولیس نے تکنیکی ذرائع کی مدد سے بروقت کارروائی کرتے ہوئے تیز رفتار گاڑی کی ٹکر سے دو شہریوں کو روندنے والا ملزم گرفتار کرلیا۔
گزشتہ رات ڈیفنس خیابان شہباز اور شاہین کراسنگ پر ایک تیز رفتار گاڑی کی ٹکر سے 2 شہری موقع پر جاں بحق ہو گئے تھے۔
پولیس نے فوری موقع پر پہنچ کر جاں بحق دونوں شہریوں کی لاشوں کو میڈیکل رپورٹ کے لیے اسپتال منتقل کیا اور موقع سے ویڈیو شواہد حاصل کیے۔
پولیس نے حاصل کردہ شواہد کی مدد سے فوری کارروائی کرتے ہوئے واقعے میں ملوث ملزم کو دو گھنٹے کے اندر ہی گرفتار کرکے مذکورہ گاڑی برآمد کر لی۔
گرفتار ملزم کی شناخت افتخار علی ولد ظفر علی جبکہ جاں بحق شہریوں کی شناخت شہباز علی اور محمد سعد کے ناموں سے ہوئی۔
جاں بحق دونوں شہری ایک نجی ریسٹورنٹ میں بطور ویٹر کام کرتے تھے اور چھٹی کر بعد اپنے گھر جا رہے تھے جبکہ ملزم افتخار علی ایک نجی بینک میں بطور منیجر کام کرتا ہے۔
پولیس نے تمام ابتدائی قانونی تقاضے پورے کرلیے ہیں جبکہ جاں بحق شہریوں کے ورثا کا کہنا ہے کہ مرحومین کی تدفین کے بعد مقدمے کے اندراج کے حوالے سے پولیس سے رابطہ کیا جائے گا۔
