راجن پور میں محکمہ جنگلات اور پولیس کا ٹمبر مافیا کے خلاف مشترکہ آپریشن دوسرے روز بھی جاری ہے، سرکاری جنگلات میں ٹمبر مافیا نے ایک سو سے زائد آراء مشینیں نصب کررکھی ہیں۔ جبکہ لسبیلہ میں بھی قیمتی درختوں کی بے دریغ کٹائی کا سلسلہ جاری ہے۔
راجن پور میں ٹمبر مافیا کے خلاف مشترکہ آپریشن کا آج دوسرا روز ہے، محکمہ جنگلات اور پولیس نے اب تک درخت کاٹنے والی 29 مشینیں اکھاڑ کرسامان ضبط جبکہ 14 ملزمان کے خلاف مقدمات درج کیے جاچکے ہیں۔
ترجمان جنگلات سب ڈویژنل فاریسٹ آفیسر محمد نوید کھوکھر کے مطابق 52 ہزار ایکڑ رقبے پر پھیلے سرکاری جنگلات میں ٹمبر مافیا نے 100 سے زائد آراء مشینیں نصب کررکھی ہیں ۔
سرکاری درخت کاٹ کر کارخانوں کے ذریعے بازار میں فروخت کیے جاتے ہیں محکمہ جنگلات نے پولیس معاونت سے تحصیل جام پور، روجھان اور راجن پور میں آپریشن کا آغاز کر رکھا ہےجبکہ جنگلات کی حدود سے آراء مشینوں کا خاتمہ اولین ترجیح ہے ۔
دوسری جانب ضلع لسبیلہ میں بے لگام ٹمبر مافیا نے درختوں کا صفایا کردیا درختوں کی بے دریغ کٹائی کی اطلاع ملنے پر ڈپٹی کمشنر لسبیلہ حمیرا بلوچ نے ضلع لسبیلہ میں ٹمبر مافیا کے خلاف سخت کاروائی کا حکم دے دیا۔
انتظامیہ نے ٹمبر مافیا کے ٹالز پر چھاپہ مار کارروائی کرکے متعدد ٹالز کو سیل کردیا، اور سیکڑوں ٹن قیمتی لکڑی قبضے میں لے لیں ٹمبر مافیا پر بھاری جرمانے عائد کئے اور ٹال مالکان کے خلاف ایف آئی آر درج کرادی ۔
