دوحہ سعودی عرب اور متحدہ عرب امارات کے بعد قطر میں بھی شوال کا چاند نظر آ گیا۔ گلف نیوز کے مطابق قطر نے سرکاری طور پر اعلان کر دیا ہے کہ عید الفطر 21 اپریل بروز جمعہ منائی جائے گی۔ بتایا گیا ہے کہ قطر میں شوال کا چاند نظر آ گیا ہے۔ دوسری جانب سعودی عرب اور متحدہ عرب امارات میں عید الفطر کا چاند نظر آ گیا۔
سعودی عرب اور متحدہ عرب امارات میں رمضان المبارک کا 29 ایام کے بعد اختتام ہو گیا۔ حرمین شریفین کے ٹوئٹر اکاونٹ سے جاری پیغام کے مطابق سعودی عرب کے علاقے تمیر میں شوال کا چاند نظر آنے کی تصدیق ہو گئی، جبکہ خلیج ٹائمز کے مطابق متحدہ عرب امارات میں بھی چاند نظر آ گیا۔ یوں سعودی عرب اور امارات دونوں ممالک میں عید الفطر کل 21 اپریل بروز جمعہ کو منائی جائے گی۔
سعودی عرب دنیا کا پہلا ملک ہے جہاں شوال کا چاند نظر آیا، جبکہ اس کے بعد متحدہ عرب امارات میں بھی شوال کا چاند نظر آگیا۔ اس سے قبل 3 اسلامی ممالک سمیت 7 ممالک نے بھی عید الفطر کی حتمی تاریخ کا باضابطہ اعلان کر دیا۔ برونائی دارالاسلام، انڈونیشیا، ملائیشیا، آسٹریلیا، سنگاپور، جاپان اور تھائی لینڈ میں بسنے والے مسلمان 22 اپریل بروز ہفتہ کو عید منائیں گے۔
