نگراں وزیراعلیٰ پنجاب محسن نقوی نے پنجاب میں بچوں میں نموینہ کے کیسوں میں اضافے پر تشویش کا اظہار کرتے ہوئے پنجاب کے اسکولوں میں 31 جنوری تک صبح کی اسمبلی پر پابندی اور پلے گروپ سے پہلی کلاس تک 7 روز کی تعطیلات کے احکامات جاری کردیے۔
نگراں وزیراعلیٰ پنجاب محسن نقوی کی زیر صدارت لاہور کے چلڈرن اسپتال میں اعلی سطح کا اجلاس ہوا، جس میں نموینہ سے بچاؤ اور احتیاطی تدابیر کے بارے میں طویل مشاورت اور اہم فیصلے کیے گئے۔
نگران وزیراعلی پنجاب کی جانب سے بچوں میں نموینہ کے کیسز میں اضافے پر اظہار تشویش بھی کیا گیا۔
ماہرین صحت نے بتایا کہ سردی میں اضافہ کے ساتھ وائرل نمونیہ خصوصا بچوں میں مرض بڑھ رہا ہے۔
اجلاس میں نگران صوبائی وزیر تعلیم منصور قادر، سیکرٹری صحت، سپیشل سیکرٹری صحت اور ماہرین صحت و سینر ڈاکٹرز کی جانب سے تجاویز پیش کی گئیں۔
محسن نقوی نے بتایا کہ لاہور کے چلڈرن اسپتال میں 10 میں سے 8 بچے نمونیہ کے مریض ہیں، جس کے بعد نگراں پنجاب حکومت کی جانب سے پنجاب بھر کے اسکولوں میں 31 جنوری تک صبح کی اسمبلی پر پابندی عائد کر دی گئی اور کلاس ون سے نیچے نرسری اور پلے گروپ کی کلاسز کے لیے 7 روز کی تعطیلات کا اعلان کردیا گیا ۔
اجلاس سے خطاب کرتے ہوئے نگراں وزیراعلیٰ پنجاب کا کہنا تھا کہ بچے ماسک کا استعمال کریں، ہاتھ دھوئیں، گرم کپڑوں کا استعمال کریں۔
