کراچی میں خنکی بڑھتے ہی مونگ پھلی کے دام بھی بڑھ گئے۔ خشک میوہ جات میں سب سے سستی سمجھی جانے والی مونگ پھلی بھی غریب عوام کی دسترس سے دور ہوگئی۔
شہر قائد میں مونگ پھلی کے نرخ بھی آسمان پر پہنچ گئے، ملک میں جاری مہنگائی کے طوفان کی وجہ سے سردیوں کی سوغات بھی عام آدمی کی جیب پر بھاری پڑنے لگی ہے۔
شہر میں اول درجہ کی مونگ پھلی پارا چنار 1400 روپے فی کلو میں فروخت ہو رہی ہے، درجہ دوم کی مونگ پھلی کی قیمت بھی ایک ہزار روپے فی کلو ہے۔ یہی وجہ ہے کہ خشک میوہ جات کی دکانوں پر اب ویرانی اور سناٹا نظر آتا ہے۔
دکانداروں کا کہنا ہے کہ مہنگائی اتنی ہے کہ لوگ قیمت سن کر ہی حیران ہوجاتے ہیں۔ ماضی کے مقابلے میں کاروبار بہت کم ہوچکا ہے۔
عوام کا کہنا ہے کہ اب تو لگتا ہے کہ مونگ پھلی بھی گن گن کر کھانے کو ملے گی۔ شہری کہتے ہیں جب دو وقت کی روٹی کا حصول ہی مشکل ہوجائے تو پھر مونگ پھلی خریدنے کون جائے گا۔
