وزیراعظم شہباز شریف نے کہا ہے کہ 18 سے 45 سال کے شہری آسان شرائط پر قرض کیلئے درخواست دے سکتے ہیں، تفصیلات کے مطابق سماجی رابطوں کی ویب سائٹ ٹوئٹر پر اپنے پیغام میں انہوں نے کہا کہ پی ایم یوتھ لون اسکیم کے نفاذ کا جائزہ لینے کے لیے منعقدہ ایک میٹنگ کے دوران میں نے تمام متعلقہ اداروں کو ہدایت کی ہے کہ وہ اسکیم میں آپریشنل مشکلات کو دور کریں اور 30 جون 2023 تک نوجوانوں میں 30 ارب روپے کی تقسیم کا ہدف حاصل کریں۔
وزیراعظم نے کہا کہ پی ایم یوتھ لون اسکیم کا مقصد انٹرپرینیورشپ کو فروغ دینا اور نوجوانوں کے لیے روزگار کے فائدہ مند مواقع پیدا کرنا ہے، 18 سے 45 سال کی عمر کے لوگ آسان شرائط و ضوابط پر قرض کے لیے درخواست دے سکتے ہیں، خواتین کے لیے 25 فیصد کوٹہ ہے۔
The PM Youth Loan Scheme is aimed at promoting entrepreneurship & creating gainful employment opportunities for the youth. People aged between 18 & 45 years can apply for loans on easy terms & conditions. There is a 25% quota for women. 2/2 https://t.co/yIEnxLskxy
— Shehbaz Sharif (@CMShehbaz) February 9, 2023
علاوہ ازیں وزیر اعظم شہباز شریف کی زیر صدارت پرائم منسٹر یوتھ لون سکیم کے حوالے سے اہم جائزہ اجلاس ہوا، اس دوران وزیراعظم نے پی ایم یوتھ لون سکیم کے حوالے سے تمام تر آپریشنل مسائل ترجیحی بنیادوں پر حل کرنے کی ہدایت کر دی، وزیر اعظم کی سربراہی میں پی ایم یوتھ لون سکیم کی کارکردگی اور کام کی رفتار کو جانچنے کے حوالے سے سٹیئرنگ کمیٹی قائم کر دی گئی۔
اس اجلاس سے گفتگو کرتے ہوئے وزیر اعظم نے کہا کہ حکومت نوجوانوں میں انٹرپرنیور شپ اور روزگار کے فروغ کے حوالے سے خاطر خواہ اقدامات کر رہی ہے، نوجوانوں کو آسان شرائط پر قرضوں کی فراہمی کو بھی یقینی بنایا جا رہا ہے۔ انہوں نے مزید کہا کہ نوجوان پاکستان کا اثاثہ ہیں جن کی فلاح و بہبود سے ملکی ترقی جڑی ہوئی ہے، 30 جون 2023 تک پی ایم یوتھ لون سکیم کے ذریعے 30 ارب روپے تک قرضوں کی فراہمی کے ہدف کو پورا کیا جائے۔
