لاہور چیئرمین پاکستان تحریک انصاف عمران خان نے کہا ہے کہ آئین کی پاسداری کیلئے ہر طرح کی اے پی سی میں بیٹھنے کو تیار ہوں۔
انہوں نے سی پی این ای کے صدر کاظم خان سے ملاقات کے دوران کہا پی ڈی ایم سیاسی اتحاد نہیں چوروں کا گروہ ہے، الیکشن کی تاریخ مافیا کی سیاسی موت ہے۔
سابق وزیر اعظم عمران خان نے کہا کہ وزیرداخلہ رانا ثنا اللہ بزدل آدمی ہے، رانا ثنا اللہ وزیر داخلہ نہیں دہشت گرد مافیا کا رکن ہے، قتل کی دھمکیوں اور ارادے کے خلاف قانونی چارہ جوئی کروں گا۔
عمران خان نے واضح طور پر کہا الیکشن اگر مقررہ تاریخ سے آگے گئے تو سمجھیں قانون ختم، پی ٹی آئی کے امیدواران 30 اپریل کے حساب سے مہم جاری رکھیں۔
چیئرمین پی ٹی آئی عمران خان نے کہا کہ عدلیہ پر الزام تراشی اور دباؤ میں لانے کی کوششیں ن لیگ کا پرانا وطیرہ ہیں، یہ وہی ہیں جن کے مسلح جتھے سپریم کورٹ پر حملہ آور ہوئے تھے۔
