پاکستان تحریک انصاف کے چیئرمین سابق وزیرِاعظم عمران خان کی سابق اہلیہ جمائما کی رومانوی کامیڈی فلم ’واٹس لو گاٹ ٹو ڈو وِد اِٹ ‘ کا رنگا رنگ پریمیئر لندن میں لیسٹر اسکوائر کے اوڈین لکس سینما میں ہوا۔لندن میں ہونے والے پریمیئر میں فلم کی پوری کاسٹ نے بھرپور شرکت کی، لیکن پنک کارپٹ پر توجہ کا مرکز بنی فلم کی پروڈیوسر اور اسکرپٹ رائٹر جمائما خان جو اپنے بچوں سلمان ، قاسم اور ٹیریان وائٹ کے ہمراہ آئیں۔
جمائما ان دنوں اپنی فلم کی پروموشن کے لیے انٹرویوز بھی دے رہی ہیں۔تاہم حال ہی میں ان کا برطانوی اخبار ڈیلی میل کو دیا گیا انٹرویو خبروں کی زینت بن گیا جس میں وہ اپنے بیٹوں کے ساتھ ساتھ ٹیریان وائٹ کا بھی ذکر کرتی ہیں۔
ڈیل میلی میں شائع رپورٹ کے مطابق جمائما خان کہتی ہے کہ گذشتہ سال 3 نومبر کو جب انہیں سابق شوہر عمران خان پر ہونے والے قاتلانہ حملے سے متعلق معلوم ہوا تو ان کے ذہن میں سب سے پہلے عمران خان کے دونوں بیٹے قاسم، سلیمان اورعمران خان کی 30 سالہ بیٹی ٹیریان وائٹ آئے۔
اسی حوالے سے گفتگو کرتے ہوئے سینئر صحافی حامد میر نے کہا ہے کہ ایسا پہلی بار ہوا ہے کہ جمائما خان کی طرف سے اس بات کو تسلیم کیا گیا ہے کہ ٹیریان وائٹ عمران خان کی بیٹی ہیں۔جمائما خان کے اس انٹرویو پر ممکنہ طور پر عمران خان کے لیے مشکلات بھی کھڑی ہو سکتی ہیں۔
اسی حوالے سے صدر اسلام آباد ہائیکورٹ بار شعیب شاہین نے کہا ہے کہ ٹیریان وائٹ سے متعلق جمائما کے بیان کی قانونی حیثیت نہیں۔جمائما عمران خان کی سابق اہلیہ ہیں، جمائما کے بیان کو ریحام خان کی کتاب کی طرح ہی لیا جائے گا۔عمران خان کے خلاف مبینہ بیٹی کو چھپانے کا کیس اس وقت اسلام آباد ہائیکورٹ کے لارجر بینچ میں زیر سماعت ہے۔
