انڈیانا امریکہ میں ایک خاتون حد سے زیادہ پانی پینے کے باعث انتقال کر گئی ہیں، دار فانی سے کوچ کر جانے والی خاتون نے پیاس بجھانے کے لیے 20 منٹوں کے دوران 64 اونس پانی پیا جو نصف گیلن کے برابر ہے۔
مؤقر امریکی اخبار نیو یارک پوسٹ کے مطابق یہ واقعہ امریکی ریاست انڈیانا میں پیش آیا ہے جہاں ایشلے سمرز نامی خاتون نے لگاتار پانی پیا اور انتقال کر گئیں۔
35 سالہ ایشلے سمرز اپنی دو بیٹیوں اور خاون کے ساتھ جولائی کے چوتھے ہفتے میںلیک فریمین فیملی ٹرپ پر گئیں جہاں انہیں پانی کی شدید کمی (ڈی ہائیڈریشن) ہوئی تھی۔
ایشلے سمرز کے بھائی ڈیوون ملر نے ڈبلیو آر ٹی وی کو بتایا کہ کسی نے کہا کہ میری بہن نے 20 منٹوں میں پانی کی چار بوتلیں پیں جو تقریباً نصف گیلن کے برابر ہیں، اتنا پانی عام افراد پورے دن میں پیتے ہیں۔
میڈیا رپورٹ کے مطابق فیملی ٹِرپ کے آخری روز ایشلے کو ایسا محسوس ہوا کہ وہ جتنا پانی پی رہی ہیں اس سے ان کی پیاس نہیں بجھ رہی جب کہ اہل خانہ کے مطابق انہیں شدید سر درد اور چکر آنے کی بھی شکایت تھی۔
ڈیوون ملر کے مطابقمیری بہن ہاولی نے مجھے کال کی اور کہا کہ ایشلے کی طبیعت بہت خراب ہے، وہ اسپتال میں ہے، اس کا دماغ سوچا ہوا ہے لیکن وجہ سمجھ میں نہیں آرہی ہے۔
ایشلے فیملی ٹرپ کے بعد واپسی پر اپنے گھر کے گیراج میں بے ہوش ہوئیں اور پھر انہیں ہوش نہیں آیا جب کہ اسپتال میں ڈاکٹروں نے کہا کہ وہ واٹر ٹاکسیٹی کے باعث انتقال کر گئی ہیں۔
واضح رہے کہ واٹر ٹاکسیٹی کو واٹر پوائزننگ یا واٹر انٹاکیسشن بھی کہا جاتا ہے، یہ تب ہوتا ہے جب انسان ضرورت سے زیادہ پانی پیتا ہے تو ایسی صورت حال میں پانی جسم میں زہر آلود ہو جاتا ہے۔
