غیر شرعی نکاح کیس میں پاکستان تحریک انصاف (پی ٹی آئی) کے سابق چیئرمین عمران خان اور ان کی اہلیہ بشریٰ بی بی پر آج فرد جرم عائد نہ ہوسکی۔
سینئر سول جج اسلام آباد قدرت اللہ نے غیر شرعی نکاح کیس کی اڈیالہ جیل میں سماعت کی، سابق چیئرمین پی ٹی آئی عدالت میں پیش ہوئے جبکہ بشریٰ بی بی علالت کے باعث آج پیش نہ ہو سکیں۔
دوران سماعت عمران خان اور بشریٰ بی بی کے وکلاء نے سماعت پیر تک ملتوی کرنے کی استدعا کی، جس پر درخواست گزار کے وکیل رضوان عباسی کی جانب سے پیر تک سماعت ملتوی کرنے کی مخالفت کرتے ہوئے کہا کہ کیس میں فرد جرم عائد ہونا ہے لہذا کل کی تاریخ رکھ لیں۔
وکیل سلمان اکرم راجہ نے عدالت کو بتایا کہ کل ہائیکورٹ میں بھی کیسز ہیں، عدالت پیش ہونا مشکل ہوگا۔
اڈیالہ جیل میں دوران سماعت عدالت نے فریقین کے دلائل سننے کے بعد کیس کی سماعت 15 جنوری تک کے لیے ملتوی کردی۔
