مسلم لیگ ن کی سینئر نائب صدر مریم نواز نے کہا ہے کہ میاں محمد نوازشریف کچھ حلقوں کے حتمی نتائج موصول ہوتے ہی جیت کی تقریر کریں گے۔مریم نواز نے سماجی رابطے کی ویب سائٹ ایکس پر اپنے پیغام میں کہا کہ کل رات میڈیا کے ایک حصے کی جانب سے جان بوجھ کر غلط تاثر دیا گیا تھا۔الحمد اللہ ن لیگ مرکز اور پنجاب میں سب سے بڑی جماعت بن کر ابھر رہی ہے۔
کچھ نتائج کا انتظار ہے۔حتمی نتائج کے موصول ہوتے ہی نوازشریف جیت کی تقریر کے لیے ن لیگ کے ہیڈ کوارٹر کا رُخ کریں گے۔
As opposed to the false perception deliberately built by a section of media last night, PMLN, Alhamdolillah emerging as the single largest party in centre and in Punjab. Some results awaited. MNS will head to PMLN HQ for the victory speech as soon as final results are received.…
— Maryam Nawaz Sharif (@MaryamNSharif) February 9, 2024
اسی طرح سابق وفاقی وزیر خزانہ اور ن لیگی رہنما اسحاق ڈار نے کہا ہے کہ آزاد امیدواروں نے ہم سے رابطہ کیا ہے، آزاد امیدوار 72 گھنٹے میں کسی جماعت کو جوائن کریں گے۔
ایک انٹرویو میں پاکستان مسلم لیگ (ن) کے رہنما اسحاق ڈار نے کہا کہ لوگ شمولیت کے لیے ہمیں رابطے کررہے ہیں، آئین کے مطابق آزاد امیدواروں کو 72 گھنٹوں میں کسی پارٹی میں شامل ہونا ہے۔
انہوںنے کہاکہ آزاد امیدوار جماعت میں شامل نہیں ہوں گے تو مخصوص نشستیں نہیں ملیں گی۔ انہوں نے کہا کہ نوازشریف نے کہا تھا کہ اکثریت ہوگی تب بھی دیگر جماعتوں کو ساتھ لیکر چلیں گے، پنجاب میں آزاد امیدوار (ن) لیگ کی کامیابی کے قریب بھی نہیں ہیں۔اسحاق ڈار نے کہا کہ بلاول بھٹو کے والد کی آزاد امیدواروں کو قابو کرنے کی صلاحیت اچھی ہے
ایک سوال کے جواب میں (ن )لیگی رہنما نے کہا کہ مانگ کر نہ پہلے ذمہ داری لی ہے اور نہ اب لوں گا، پارٹی فیصلہ کرے گی۔انہوں نے ایک سوال کا جواب دیتے ہوئے کہا کہ نتائج میں تاخیر نہیں ہونی چاہیے تھی لیکن ہم شکایت کیسے کرتے کل تمام دن موبائل فون بند تھے۔انہوںنے کہاکہ الیکشن کمیشن کو نتائج کی تاخیر پر وضاحت دینا چاہئے۔انہوں نے کہا کہ پنجاب اور وفاق میں حکومت بنانے کے لیے پر امید ہوں، جب نتائج کم آرہے تھے تب بھی (ن) لیگ آگے تھی، رات تین بجے تک کے نتائج کے مطابق (ن) لیگ زیادہ نشستوں پر جیت رہی تھی اب اگر کسی اور کی حکومت بنی تو اسے قبول کریں گے۔
