چین نے آئندہ پانچ سالوں میں خلا کی گہرائی میں تحقیق کے لیے تین مشن بھیجنے کا اعلان کر دیا۔
چینی خلائی ادارے کے نائب سربراہ بیان ژی گانگ کے مطابق چین 2025 میں سیارچوں کی تحقیق کے لیے تیان وین-2، 2030 میں مریخ سے نمونے جمع کرنے کے لیے تیان وین-3 اور اسی سال کے دوران جووین سسٹم(مشتری کے چاند)کی جانب تیان وین-4مشن روانہ کرے گا۔
بیان ژی گانگ نے ایک پریس کانفرنس میں بتایا کہ مستقبل کے یہ تین مشن سیاروں کی کھوج کے ان چار مشنز میں شامل ہیں جن کی حکومت نے منظوری دی ہے۔ مریخ کی جانب 2021 میں بھیجا گیا پہلا مشن تیان وین -1مکمل کامیابی حاصل کر چکا ہے جبکہ بقیہ مشن 10 سے 15 سالوں میں مکمل ہونے کی امید ہے۔
انہوں نے بتایا کہ ملک کے مستقبل کے سیاروں کی تحقیق کے مشنز میں نظام شمسی کی ابتدا اورارتقا، زمین پر چھوٹے اجسام اور شمسی سرگرمیوں کے اثرات اور زمین کے علاوہ کائنات میں دوسری جگہوں پر زندگی کے آثار جیسے بڑے سائنسی اہداف پر توجہ دی جائے گی۔
