بھارتی کرکٹ ٹیم کے آل راؤنڈر ہاردیک پانڈیا نے طلاق کی خبروں سے متعلق باز گشت پر خاموشی توڑ دی ۔ پانڈیا بالآخر اہلیہ نتاسا اسٹینکووچ سے علیحدگی کی تصدیق سوشل میڈیا کے زریعے کردی۔
جنوری 2020 میں منگنی اور پھر 31 مئی 2020 کو شادی کے بندھن میں بندھنے والی اسٹار جوڑی ہاردیک پانڈیا اور نتاشا اسٹینکووچ کی طلاق کی خبریں مئی سے زیرِگردش ہیں ، لیکن اب انسٹاگرام اکاؤنٹ پر جاری ایک بیان میں افواہوں کی تصدیق ہو گئی ہے۔
ہاردیک پانڈیا نے کہا کہ 4 سال ساتھ رہنے کے بعد، نتاشا اور میں نے باہمی طور پر علیحدگی کا فیصلہ کیا ہے، ہم نے مل کر اپنے رشتے کو بہتر بنانے کی بھرپور کوشش کی اور یقیناً یہ کوشش ہم دونوں کے مفاد میں بھی رہی۔
ہاردیک نے مزید لکھا کہ یہ ہمارے لیے ایک مشکل فیصلہ تھا لیکن بطور ایک فیملی ہم نے خوشی اور باہمی احترام کو مدِنظر رکھتے ہوئے ایک ساتھ بہترین وقت گزارا۔
آل راؤنڈر نے کہا کہ علیحدگی کے بعد ہم آگستیا کی کو پرینٹنگ یا مشترکہ والدین رہیں گے، اور اسکی خوشی کیلئے ہر وہ کام کریں گے جس کی ہمیں ضرورت ہوگی۔ انہوں نے چاہنے والوں سے مشکل اور حساس وقت میں پرائیویسی کا احترام کرنے کی درخواست بھی کی۔
