شہریوں کو اگر تکلیف ہوگی تو کام میں غفلت برتنے والوں کے خلاف کارروائی کروں گا، مرتضیٰ وہاب
میئر کراچی مرتضیٰ وہاب نے شہر قائد میں سیوریج کی خراب صورتحال پر سیوریج حکام کو آخری وارننگ دیدی ہے۔
مرتضیٰ وہاب نے واٹر کارپوریشن میں ہنگامی اجلاس کے دوران سیوریج کی صورتحال پر اظہار برہمی کیا۔ اجلاس میں ایم ڈی واٹر کارپوریشن اور سی ای او اسد اللہ سمیت مختلف محکموں کے سربراہاں بھی موجود تھے۔
میئر نے واٹر کارپوریشن کے محکمہ سیوریج کے افسران کی کارکردگی پرغصہ کرتے ہوئے کہا کہ شہر میں جگہ جگہ سیوریج کی شکایات ہیں۔
مرتضیٰ وہاب نے کہا کہ شہریوں کو اگر تکلیف ہوگی تو کام میں غفلت برتنے والوں کے خلاف کارروائی کروں گا۔
اس حوالے سے ترجمان نے بتایا کہ میئر نے شہر کا دورہ کیا تو ہر جگہ سڑکوں پر گندگی موجود تھی۔ جس پر محکمہ سیوریج کے حکام کو آخری وارننگ جاری کی گئی ہے۔
