وفاقی حکومت کی جانب سے کم آمدنی والے غریب عوام کیلئے پٹرولیم ریلیف پیکیج کی تیاری جاری ہے، وزیراعظم نے ہدایت کی ہے کہ سبسڈی 50 روپے فی لیٹر تک مختص کی جائے۔
وزیراعظم کی زیرصدارت پٹرولیم ریلیف پیکج پرجائزہ اجلاس منعقد ہوا۔ جس میں وزیراعظم شہباز شریف نے متعلقہ حکام کو ہدایت دی کہ پٹرولیم سبسڈی کا پروگرام جلد ازجلد مکمل کیا جائے۔
وزیراعظم نے کہا کہ پیکج میں کم آمدن صارفین کو شامل کیا جائے، سبسڈی کے لئے 50 روپے فی لیٹر تک مختص کی جائے۔
شہباز شریف نے کہا کہ پٹرولیم سبسڈی براہ راست غریب عوام کے ریلیف کا باعث بنے گی، عملدرآمد کیلئے تمام ادارے معاونت سے حکمت عملی مرتب کریں۔
انھوں نے کہا کہ موٹرسائیکل، رکشہ اور چھوٹی گاڑیاں کم آمدن والوں کی سواری ہے، حکومت شدید معاشی مشکلات کے باوجود غریب عوام کی ہر ممکن مدد کے لیے کوشاں ہیں۔
